ചൈനയ്ക്ക് വലിയ തിരിച്ചടി : എല്ലാ മോഡലുകളുടെയും ഐഫോണുകൾ ഇന്ത്യയിൽ നിർമ്മിക്കും

ന്യൂദൽഹി : വരും ദിവസങ്ങളിൽ എല്ലാ ഐഫോൺ മോഡലുകളും ഇന്ത്യയിൽ നിർമ്മിക്കാൻ ഒരുങ്ങി ആപ്പിൾ. ഇന്ത്യയിൽ നിർമ്മിക്കുന്ന ഐഫോണുകൾ അമേരിക്ക ഉൾപ്പെടെ ലോകത്തിലെ പല രാജ്യങ്ങളിലേക്കും കയറ്റുമതി ചെയ്യും. ഇത് ചൈനയ്ക്ക് വലിയ തിരിച്ചടിയാകും. ‘ഭാരത് ടെലികോം 2025’ പരിപാടിയിൽ കേന്ദ്ര മന്ത്രി ജ്യോതിരാദിത്യ സിന്ധ്യയാണ് ഈ വിവരം നൽകിയത്. അമേരിക്കയും ചൈനയും തമ്മിലുള്ള വ്യാപാര യുദ്ധം തുടരുന്നതിനിടയിൽ ഇന്ത്യ മൊബൈൽ നിർമ്മാണത്തിന്റെ ഒരു കേന്ദ്രമായി വികസിച്ചുകൊണ്ടിരിക്കുകയാണെന്നും അദ്ദേഹം പറഞ്ഞു.

അടുത്തിടെ കമ്പനിയുടെ സിഇഒ ടിം കുക്ക് ജൂൺ മുതൽ, യുഎസിൽ വിൽക്കുന്ന മിക്ക ഐഫോണുകളും ഇന്ത്യയിൽ നിന്ന് കയറ്റുമതി ചെയ്യുമെന്ന് പ്രഖ്യാപിച്ചു. അതായത് അവ പൂർണ്ണമായും ഇന്ത്യയിൽ നിർമ്മിച്ചതായിരിക്കും. എന്നിരുന്നാലും ആഗോള വിപണിയിൽ വിൽക്കുന്ന മിക്ക ഐഫോണുകളും ചൈനയിലായിരിക്കും നിർമ്മിക്കുക. അമേരിക്കയ്ക്ക് പുറമെ, ഇന്ത്യയിൽ നിർമ്മിച്ച ഐഫോണുകൾ യൂറോപ്യൻ രാജ്യങ്ങളിലേക്കും കയറ്റുമതി ചെയ്യാൻ തുടങ്ങിയിട്ടുണ്ട്.

ഇന്ത്യ ഒരു മൊബൈൽ ഇറക്കുമതിക്കാരനിൽ നിന്ന് ഒരു മുൻനിര കയറ്റുമതിക്കാരനിലേക്ക് മാറിയത് അഭിമാനകരമാണെന്ന് കേന്ദ്ര വാർത്താവിനിമയ സഹമന്ത്രി ചന്ദ്രശേഖർ പെമ്മസാനി ചടങ്ങിൽ പറഞ്ഞു. 2014-ൽ ഇന്ത്യ 60 ലക്ഷം മൊബൈൽ ഫോണുകൾ നിർമ്മിച്ചപ്പോൾ 21 കോടി യൂണിറ്റുകൾ ഇറക്കുമതി ചെയ്തു. അതേസമയം, 2024 ൽ ഇന്ത്യ 33 കോടി യൂണിറ്റുകൾ ഉത്പാദിപ്പിച്ചു, അതിൽ 5 കോടി യൂണിറ്റുകൾ ഇന്ത്യയിൽ നിന്ന് കയറ്റുമതി ചെയ്തു. പ്രധാനമന്ത്രി മോദിയുടെ മെയ്ക്ക് ഇൻ ഇന്ത്യ സംരംഭം മൂലമാണ് ഇത് സാധ്യമായതെന്നും അദ്ദേഹം പറഞ്ഞു.

ഇതിനു പുറമെ ഇന്ത്യയിലെ 99% ഗ്രാമങ്ങളിലും 5G എത്തിയിട്ടുണ്ടെന്ന് മന്ത്രി പറഞ്ഞു. രാജ്യത്തെ ജനസംഖ്യയുടെ 82% പേർക്കും 5G നെറ്റ്‌വർക്ക് ലഭ്യമാക്കാൻ കഴിഞ്ഞത് ഒരു വിപ്ലവമാണ്. ഇതിനായി 4.7 ലക്ഷം മൊബൈൽ ടവറുകൾ സ്ഥാപിച്ചു. ഇന്ത്യയിൽ അതിവേഗ മൊബൈൽ ആശയവിനിമയം നൽകുന്നതിനായി ഡിജിറ്റൽ ഹൈവേകൾ നിർമ്മിക്കപ്പെടുന്നു. രാജ്യത്തെ 140 കോടി ജനങ്ങൾക്ക് ഇതിന്റെ പ്രയോജനം ലഭിക്കുമെന്നും അദ്ദേഹം കൂട്ടിച്ചേർത്തു.