NewsIndiaInternational

ഹിസ്ബുല്‍ മുജാഹിദീന്‍ ഭീകരന്‍ താരിഖ് പണ്ഡിറ്റ് പിടിയില്‍

ശ്രീനഗര്‍: കശ്മീരില്‍ ഹിസ്ബുല്‍ മുജാഹിദീന്‍ ഭീകരന്‍ താരിഖ് പണ്ഡിറ്റ് പിടിയില്‍. ശനിയാഴ്ച്ച പുല്‍വാമ സൈനിക യൂണിറ്റിന് മുമ്പാകെ അപ്രതീക്ഷിതമായി കീഴടങ്ങുകയായിരുന്നു. ‘എ’ കാറ്റഗറി തീവ്രവാദികളില്‍പ്പെടുന്ന താരിഖിനെ കുറിച്ച് വിവരങ്ങള്‍ കൈമാറുന്നവര്‍ക്ക് മൂന്നു ലക്ഷം രൂപ പാരിതോഷികം അധികൃതര്‍ പ്രഖ്യാപിച്ചിരുന്നു. ഹിസ്ബുല്‍ മുഖ്യ കമാന്‍ഡര്‍ ബുര്‍ഹാന്‍ വാണിയുടെ പ്രധാന സഹായിയായാണ് ഇയാള്‍ അറിയപ്പെടുന്നത്.

ആറു മാസങ്ങള്‍ക്കു മുമ്പ് പുല്‍വാമ ജില്ലയില്‍ യുവാക്കളെ ഹിസ്ബുല്‍ മുജാഹിദീനില്‍ ചേര്‍ക്കാന്‍ ശ്രമം നടത്തിയതിന് പിന്നില്‍ ബുര്‍ഹാന്‍ വാണിയുടെ നേതൃത്വത്തിലുള്ള സംഘമാണെന്ന് റിപ്പോര്‍ട്ടുണ്ട്. താരിഖിനെ ചോദ്യം ചെയ്യുന്നത് വഴി ബുര്‍ഹാന്‍ വാണിയെ കുറിച്ച് കൂടുതല്‍ വിവരങ്ങള്‍ ലഭിക്കുമെന്ന് പൊലീസ് വൃത്തങ്ങള്‍ വ്യക്തമാക്കി.

കശ്മീരില്‍ നിരവധി ഭീകര പ്രവര്‍ത്തനങ്ങളില്‍ പങ്കാളിയാണ് താരീഖ്. കഴിഞ്ഞ ഏപ്രിലില്‍ സുരക്ഷാ സേനയുമായുള്ള ഏറ്റുമുട്ടലിനിടെ താരിഖിന്റെ ബന്ധു നസീര്‍ കൊല്ലപ്പെട്ടിരുന്നു. നസീറിനൊപ്പമാണ് ഇയാള്‍ ഹിസ്ബുല്‍ മുജാഹിദീനില്‍ അംഗമാവുന്നത്. നസീറിന്റെ മരണത്തോടെ കീഴടങ്ങാന്‍ സന്നദ്ധത പ്രകടിപ്പിച്ച് ദൂതര്‍ മുഖേന സുരക്ഷാസേനയുമായി താരിഖ് ബന്ധപ്പെട്ടിരുന്നു.

Related Articles

Post Your Comments


Back to top button