സംഘര്‍ഷങ്ങളെ രാഷ്​ട്രീയവത്​കരിക്കുന്നത്​ തെറ്റായ നടപടിയാണ്; കോണ്‍ഗ്രസ്​ അധ്യക്ഷ സോണിയ ഗാന്ധിയുടെ പ്രസ്​താവനക്ക്​ മറുപടിയുമായി കേന്ദ്രമന്ത്രി പ്രകാശ്​ ജാവദേകര്‍

ന്യൂഡല്‍ഹി: രാജ്യ തലസ്ഥാനത്ത്​ സംഘര്‍ഷം നടക്കുമ്പോഴും കോൺഗ്രസ് സംഘര്‍ഷങ്ങളെ രാഷ്​ട്രീയവത്​കരിക്കുകയാണെന്നും ഇത് തെറ്റായ നടപടിയാണെന്നും കേന്ദ്രമന്ത്രി പ്രകാശ്​ ജാവദേകര്‍. പൗരത്വ പ്രക്ഷോഭകര്‍ക്ക് നേരെ നടന്ന ആക്രമണം ആസൂ​ത്രിതമാണെന്നും അക്രമങ്ങള്‍ തടയുന്നതിൽ കേന്ദ്ര സര്‍ക്കാരും ഡല്‍ഹി സര്‍ക്കാരും പരാജയപ്പെട്ടുവെന്നുമുള്ള കോണ്‍ഗ്രസ്​ അധ്യക്ഷ സോണിയാ ഗാന്ധിയുടെ പ്രസ്​താവനക്ക്​ മറുപടി പറയുകയായിരുന്നു മന്ത്രി.

ആഭ്യന്തരമന്ത്രി അമിത്​ ഷാ കഴിഞ്ഞ ദിവസം വിളിച്ച അടിയന്തരയോഗത്തിൽ പൊലീസിന്റെ മനോവീര്യം ഉയര്‍ത്തുന്ന തരത്തിലാണ്​ അദ്ദേഹം സംസാരിച്ചത്​. എന്നാല്‍ അക്രമത്തെ രാഷ്ട്രീയവത്കരിക്കുന്നതിലൂടെ കോണ്‍ഗ്രസ് പൊലീസിന്റെ മനോവീര്യം തകര്‍ക്കുകയാണ്​.1984ല്‍ രാജ്യത്തിലുടനീളം സിഖുകാര്‍ കൊല്ലപ്പെട്ടു. ആരാണ് ആ അക്രമത്തിന് തുടക്കമിട്ടതെന്ന് അന്വേഷണത്തിലൂടെ വ്യക്തമാകുമെന്നും ജാവദേകര്‍ പറഞ്ഞു.

ALSO READ: ഡൽഹി കലാപം: സമാധാനം നിലനിർത്തണമെന്ന് നരേന്ദ്ര മോദി

ഡല്‍ഹിയില്‍ അക്രമത്തിന്​ തുടക്കമിട്ടത്​ ആരെന്ന്​ പൊലീസ്​ അന്വേഷണത്തിൽ വ്യക്തമാകുമെന്നും മന്ത്രി പറഞ്ഞു. സംഘര്‍ഷ സാഹചര്യത്തിലും ഒന്നും ചെയ്യാതെ കേന്ദ്രസര്‍ക്കാറിനെ കുറ്റപ്പെടുത്തുന്ന തരത്തിലുള്ള തരംതാഴ്​ന്ന രാഷ്​ട്രീയത്തില്‍ ബി.ജെ.പി വിശ്വസിക്കുന്നില്ല. അദ്ദേഹം കൂട്ടിച്ചേർത്തു. ഡല്‍ഹിയിലെ സംഘര്‍ഷത്തിന്റെ ഉത്തരവാദിത്വം ഏറ്റെടുത്ത് അമിത് ഷാ ആഭ്യന്തര മന്ത്രിസ്ഥാനം രാജിവെക്കണമെന്ന്​ സോണിയ ഗാന്ധി വാര്‍ത്താസമ്മേളനത്തില്‍ ആവശ്യപ്പെട്ടിരുന്നു.