COVID 19Latest NewsNewsGulfQatar

കൾച്ചറൽ ഫോറം സൗജന്യ ചാർട്ടേഡ് വിമാനം നാടണഞ്ഞു.

ദോഹ • കോവിഡ് പ്രതിസന്ധിയെ തുടർന്ന് ടിക്കറ്റ് ചാർജ് പോലും കൊടുക്കാനില്ലാതെ നാട്ടിലേക്കെത്താൻ പ്രയാസപ്പെട്ട 171പേരുടെ സ്വപ്നങ്ങൾക്ക് ചിറകു വിരിച്ച സൗജന്യ ചാർട്ടേഡ് വിമാനം നാടണഞ്ഞു. ഖത്തറിൽ നിന്നും പ്രവാസി സംഘടനയുടെ നേതൃത്വത്തിലുള്ള ആദ്യ സൗജന്യ ചാർട്ടേഡ് വിമാനം കൂടിയാണ് ഇന്നലെ കോഴിക്കോട് എയർപോർട്ടിൽ ലാൻഡ് ചെയ്തത് . കോവിഡ് കാലത്ത് പ്രവാസി സമൂഹത്തിൽ വൈവിധ്യങ്ങളായ ജനസേവന പ്രവർത്തനങ്ങൾക്ക് നേതൃത്വം നൽകിയ കൾച്ചറൽ ഫോറത്തിന് കീഴിലുള്ള സൗജന്യ ചാർട്ടേഡ് വിമാനമാണ് ഇന്നലെ രാവിലെ ഹമദ് വിമാനത്താവളത്തിൽ നിന്ന് കരിപ്പൂർ വിമാനത്താവളത്തിലെത്തിയത്. സന്ദർശക വിസയിലെത്തി തിരിച്ച് പോകാൻ പ്രയാസപ്പെടുന്നവരും , തൊഴിൽ നഷ്ടപ്പെട്ടും മറ്റും സാമ്പത്തിക പ്രയാസമനുഭവിക്കുന്നവരുമായ 171 പേരുടെ യാത്ര സ്വപ്നങ്ങളാണ് ഇതോടെ സഫലമായത്.

ഖത്തറിലെ പ്രമുഖ സാമൂഹ്യ ജീവകാരുണ്യ സംഘടനയായ സെൻ്റർ ഫോർ ഇന്ത്യൻ കമ്മ്യൂണിറ്റി (സി.ഐ.സി. ഖത്തർ). അസീം ടെക്നോളജീസ് എന്നിവരും സൗജന്യ ചാർട്ടേഡ് വിമാനവുമായി സഹകരിച്ചിരുന്നു. മുഴുവൻ യാത്രക്കാരും രാവിലെ 6 മണിക്ക് തന്നെ വിമാനത്താവളത്തിലെത്തുകയും ടീം വെൽഫെയറിന്റെയും കൾച്ചറൽ ഫോറം നേതാക്കളുടെയും സാന്നിധ്യത്തിൽ ടിക്കറ്റ് വിതരണം നടക്കുകയും ചെയ്തിരുന്നു. കോവിഡ് കാലത്ത് യാത്രാ ബുദ്ധിമുട്ടനുഭവിക്കുന്നവർക്ക് നൂറ് സൗജന്യ ടിക്കറ്റുകൾ കൾച്ചറൽ ഫോറം നേരത്തെ പ്രഖ്യാപിച്ചിരുന്നു. വന്ദേ ഭാരത് വിമാനത്തിൽ നിരവധി പേർ കൾച്ചറൽ ഫോറം ടിക്കറ്റ് ഉപയോഗപ്പെടുത്തി യാത്ര ചെയ്തിട്ടുണ്ട് . വെൽഫെയർ പാർട്ടി കേരള ഘടകം പ്രഖ്യാപിച്ച തിരിച്ചുവരുന്നവർക്കുള്ള സൗജന്യ ടിക്കറ്റിൻ്റെ ഭാഗമായാണ് കൾച്ചറൽ ഫോറം ഖത്തറിൽ നൂറ് സൗജന്യ ടിക്കറ്റുകൾ പ്രഖ്യാപിച്ചിരുന്നത് . ഖത്തറിൽ നിന്നുള്ള പ്രവാസി സംഘടനകളുടെ ആദ്യ സൗജന്യ ചാർട്ടേഡ് വിമാനം എന്ന പ്രഖ്യാപനം നടപ്പിലാക്കാൻ സാധിച്ചതിൽ അഭിമാനമുണ്ടെന്ന് കൾച്ചറൽ ഫോറം പ്രസിഡൻ്റ് ഡോ: താജ് ആലുവ പറഞ്ഞു. കൂടുതൽ സംഘടനകൾ സൗജന്യ ചാർട്ടേഡ് വിമാനങ്ങളുമായി മുന്നോട്ട് വരാൻ കൾച്ചറൽ ഫോറം പ്രഖ്യാപനം പ്രചോദനമാകട്ടെയെന്നും അദ്ദേഹം പറഞ്ഞു.

സൗജന്യ വിമാനത്തിനുള്ള അനുമതി ലഭ്യമാക്കുന്നതിൽ പൂർണ്ണ സഹകരണം നൽകിയ ഇന്ത്യൻ എംബസി അധികൃതർക്കും ഇതുമായി സഹകരിച്ച സംഘടനകൾക്കും സ്ഥാപനങ്ങൾക്കും അദ്ദേഹം പ്രത്യേകം നന്ദി പറഞ്ഞു.

സെന്റർ ഫോർ ഇന്ത്യൻ കമ്മ്യൂണിറ്റി ആക്ടിങ് പ്രസിഡന്റ്‌ ഹബീബ് റഹ്‌മാൻ കിഴിശ്ശേരി, അസീം ടെക്‌നോളജീസ് പ്രതിനിധികളായ അജ്മൽ, നജീബ്, കൾച്ചറൽ ഫോറം ജനറൽ സെക്രട്ടറിമാരായ മജീദലി, മുഹമ്മദ്‌ റാഫി, മുനീഷ് എ സി തുടങ്ങിയവർ യാത്രയയപ്പ് വേളയിൽ സംബന്ധിച്ചു.

കൾച്ചറൽ ഫോറത്തിന് കീഴിലുള്ള ആദ്യചാർട്ടേഡ് വിമാനം കഴിഞ്ഞ ദിവസം കണ്ണൂരിലേക്ക് പോയിരുന്നു. മൂന്നാമത് ചാർട്ടേഡ് വിമാനം ഈ മാസം 30 ന് കൊച്ചിയിലേക്ക് യാത്ര തിരിക്കുമെന്ന് സെക്രട്ടറിമാരായ ഷാഫി മൂഴിക്കൽ, അബ്ദുൽ ഗഫൂർ എ ആർ എന്നിവർ അറിയിച്ചു.

Tags

Related Articles

Post Your Comments


Back to top button
Close
Close