ദില്ലി : മുംബൈയിലെ കങ്കണ റണാവത്തിന്റെ ഓഫീസ് മുംബൈ മുനിസിപ്പല്‍ കോര്‍പ്പറേഷന്‍ പൊളിച്ച് ദിവസങ്ങള്‍ പിന്നിടുമ്പോള്‍ താരത്തിന് വീണ്ടും നോട്ടീസ് ലഭിച്ചിരിക്കുകയാണ്. ഇത്തവണ ഓഫീസല്ല മറിച്ച് ഖാര്‍ വീട്ടിലെ അനധികൃത നിര്‍മാണത്തെക്കുറിച്ചാണ് നടിക്ക് നോട്ടീസ് ലഭിച്ചത്. പാലി ഹില്ലിലെ ഓഫീസിനേക്കാള്‍ കൂടുതല്‍ ക്രമക്കേടുകള്‍ താരത്തിന്റെ വീട്ടിലുണ്ടെന്ന് ബിഎംസി പറയുന്നു.
ഖാര്‍ വെസ്റ്റിലുള്ള ഒരു കെട്ടിടത്തിന്റെ അഞ്ചാം നിലയിലാണ് കങ്കണ താമസിക്കുന്നത്. അവര്‍ക്ക് കെട്ടിടത്തില്‍ മൂന്ന് ഫ്‌ലാറ്റുകളുണ്ട്. ഇതിനെതിരെയാണ് ഇപ്പോള്‍ ബിഎംസി തിരിയുന്നത്. നേരത്തെ സെപ്റ്റംബര്‍ 9 ന് കങ്കണയുടെ മുംബൈ ഓഫീസ് ബിഎംസി പൊളിച്ചുനീക്കിയിരുന്നു.
പിന്നീട്, നിയമവിരുദ്ധമായ നിര്‍മ്മാണത്തിന് മുംബൈ സിവില്‍ ബോഡി നല്‍കിയ നോട്ടീസിനെ ചോദ്യം ചെയ്ത് കങ്കണ ബോംബെ ഹൈക്കോടതിയെ സമീപിച്ചിരുന്നു. തുടര്‍ന്ന് ബോംബെ ഹൈക്കോടതി ഓഫീസ് പൊളിച്ചുനീക്കുന്നതിന് സ്റ്റേ അനുവദിച്ചു. തുടര്‍ന്ന് നടിയുടെ ഹര്‍ജിയില്‍ മറുപടി നല്‍കാന്‍ ബിഎംസിയോട് ആവശ്യപ്പെട്ടു.
ബിഎംസിയില്‍ നിന്ന് എന്തുകൊണ്ടാണ് ഇത്തരം നടപടികള്‍ ഉണ്ടായതെന്ന് അറിയാന്‍ കോടതി ആവശ്യപ്പെടുകയും അപേക്ഷയ്ക്ക് മറുപടിയായി സത്യവാങ്മൂലം സമര്‍പ്പിക്കാന്‍ നിര്‍ദ്ദേശിക്കുകയും ചെയ്തു. എംഎംസി നിയമത്തിലെ സെക്ഷന്‍ 351 പ്രകാരം ചൊവ്വാഴ്ച ബിഎംസി പൊളിച്ചുനീക്കല്‍ നോട്ടീസ് നല്‍കിയിരുന്നു. നോട്ടീസിനോട് പ്രതികരിക്കാന്‍ പൗരസമിതി 24 മണിക്കൂര്‍ സമയം നല്‍കി.
ഒരു ദിവസം മുമ്പ്, കങ്കണ തന്റെ സോഷ്യല്‍ മീഡിയ അക്കൗണ്ടിലൂടെ മുംബൈയിലെ തന്റെ സ്വത്ത് പൊളിച്ചുമാറ്റുന്നത് സംബന്ധിച്ച് ബിഎംസി നോട്ടീസിന് അഭിഭാഷകന്‍ റിസ്വാന്‍ സിദ്ദിഖി നല്‍കിയ മറുപടിയുടെ ഒരു പകര്‍പ്പ് പങ്കുവെക്കുകയും ചെയ്തിരുന്നു.
ശിവസേന എംപി സഞ്ജയ് റാവത്തിന്റെ ഭീഷണിക്കെതിരെ പാകിസ്ഥാന്‍ അധിനിവേശ കശ്മീര്‍ എന്ന് ട്വിറ്ററില്‍ നടത്തിയ പരാമര്‍ശത്തെ തുടര്‍ന്നാണ് കങ്കണ പ്രശ്നത്തിലായത്. പോലീസില്‍ വിശ്വാസമില്ലെങ്കില്‍ മുംബൈയിലേക്ക് വരേണ്ടെന്ന് സഞ്ജയ് റാവത്ത് ഭീഷണിപ്പെടുത്തിയെന്ന് അവര്‍ ആരോപിച്ചിരുന്നു. തുടര്‍ന്ന് ആഭ്യന്തര മന്ത്രാലയം കങ്കണയ്ക്ക് വൈ കാറ്റഗറി സുരക്ഷ ഏര്‍പ്പാടാക്കുകയും ചെയ്തു.
Post Your Comments