കോപ അമേരിക്കയിൽ ചിലിയെ തകർത്ത് പരാഗ്വേ: ഉറുഗ്വേയ്ക്ക് തകർപ്പൻ ജയം

ബ്രസീലിയ: കോപ അമേരിക്ക ഗ്രൂപ്പ് എ മത്സരത്തിൽ ഉറുഗ്വേയ്ക്ക് തകർപ്പൻ ജയം. ബൊളീവിയയെ എതിരില്ലാത്ത രണ്ട് ഗോളുകൾക്കാണ് ഉറുഗ്വേ പരാജയപ്പെടുത്തിയത്. മത്സരത്തിന്റെ ആദ്യ പകുതിയിൽ നാൽപ്പതാം മിനിറ്റിൽ കിന്റോസിന്റെ സെൽഫ് ഗോളിലൂടെ ഉറുഗ്വേ മുന്നിലെത്തിയിരുന്നു. മത്സരത്തിന്റെ രണ്ടാം പകുതിയിൽ പൂർണ ആധിപത്യം നേടിയ ഉറുഗ്വേ 79-ാം മിനിറ്റിൽ സൂപ്പർതാരം എഡിസൺ കവാനിയുടെ ഗോളിലൂടെ ജയമുറപ്പിച്ചു.

കോപ അമേരിക്കയിലെ എ ഗ്രൂപ്പിൽ ഉറുഗ്വേയ്ക്ക് പിന്നാലെ ക്വാർട്ടർ ഉറപ്പിച്ച് പരാഗ്വേയും. ശക്തരായ ചിലിയെ എതിരില്ലാത്ത രണ്ടു ഗോളിന് കീഴടക്കിയാണ് പരാഗ്വേ ഘട്ടം കടക്കുന്നത്. 33-ാം മിനിറ്റിൽ ബ്രയാൻ സമുദിയോയിലൂടെയാണ് പരാഗ്വേ ആദ്യ ഗോൾ നേടിയത്. കോർണറിൽ നിന്നായിരുന്നു ആദ്യ ഗോൾ പിറന്നത്. അൽമിറോൺ എടുത്ത കോർണറിൽ ഹെഡ് ചെയ്ത് ബ്രയാൻ പന്ത് ഗോൾ വലയ്ക്കുള്ളിലെത്തിച്ചു.

Read Also:- യൂറോ കപ്പ് പ്രീ ക്വാർട്ടർ പോരാട്ടങ്ങൾക്ക് നാളെ തുടക്കം

58-ാം മിനിറ്റിൽ പെനാൽറ്റിയിലൂടെയായിരുന്നു പരാഗ്വേയുടെ രണ്ടാമത്തെ ഗോൾ. കാർലോസ് ഗോൺസാലസിനെതിരായ ചിലി താരത്തിന്റെ ഫൗളാണ് പരാഗ്വേയ്ക്ക് പെനാൽറ്റി നേടിക്കൊടുത്തത്. പെനാൽറ്റി വലയിലാക്കിയത് അൽമിറോൺ. ചിലി നേരത്തെ തന്നെ കോപ അമേരിക്ക ക്വാർട്ടർ ഉറപ്പിച്ചിരുന്നു. കളിയിൽ കൂടുതൽ ആധിപത്യം പുലർത്തി കളിച്ചത് ചിലി ആയിരുന്നു.