തന്റെ ദിവസത്തിൽ ആരെയും തച്ചുതകർക്കാമെന്ന ആത്മവിശ്വാസം ആ ഇന്ത്യൻ താരത്തിനുണ്ടായിരുന്നു: മുത്തയ്യ മുരളീധരൻ

കൊളംബോ: തന്നെ ഏറെ ഭയപ്പെടുത്തിയ ബാറ്റ്സ്മാനെ വെളിപ്പെടുത്തി സ്പിൻ ഇതിഹാസം മുത്തയ്യ മുരളീധരൻ. ഇന്ത്യയുടെ വെടിക്കെട്ട് ബാറ്റ്സ്മാൻ വീരേന്ദർ സെവാഗിനെതിരെ പന്തെറിയാനാണ് താൻ ഭയന്നിരുന്നതെന്ന് മുരളി വെളിപ്പെടുത്തി.

‘സച്ചിനെതിരെ പന്തെറിയാൻ ഭയമില്ലായിരുന്നു. കാരണം സെവാഗിനോളം സച്ചിൻ മുറിപ്പെടുത്തിട്ടില്ല. സച്ചിൻ ബോളർക്ക് ക്ഷതമുണ്ടാക്കില്ല. എങ്കിലും സച്ചിനെ പുറത്താക്കാൻ പ്രയാസമാണ്’ മുരളീധരൻ പറഞ്ഞു.

സെവാഗ് ബാറ്റ് ചെയ്യുമ്പോൾ ശക്തമായ ഫീൽഡിങ് വിന്യസമാണ് നടത്തുക. കാരണം സെവാഗ് കടന്നാക്രമിക്കുമെന്ന് അറിയാം. ബ്രയാൻ ലാറയും സച്ചിനും ബോളർമാരെ ബഹുമാനിക്കും. എന്നാൽ സെവാഗിൽ നിന്ന് അത് ലഭിക്കില്ല. തന്റെ ദിവസത്തിൽ ആരെയും തച്ചുതകർക്കാമെന്ന ആത്മവിശ്വാസം സെവാഗിനുണ്ടായിരുന്നു. അതിനാൽ സെവാഗ് പിഴവ് വരുത്തുന്നത് കാത്തിരിക്കുകയേ വഴിയുണ്ടായിരുന്നുള്ളു.

ഒരു ടെസ്റ്റിന്റെ രണ്ട് മണിക്കൂറിനുള്ളിൽ 150 റൺസ് ഉറപ്പാക്കുന്നതായിരുന്നു സെവാഗിന്റെ ശൈലി. സച്ചിൻ വിക്കറ്റ് സംരക്ഷിക്കും. സാങ്കേതികത്തികവുള്ള സച്ചിനെ പുറത്താക്കുക ദുഷ്കരമായിരുന്നു. സെവാഗും ലാറയുമാണ് തന്റെ പന്തുകളുടെ ഗതിമാറ്റത്തെ ശരിക്കും മനസിലാക്കിട്ടുള്ളതെന്നും നന്നായി കളിച്ചിട്ടുള്ളതെന്നും മുരളീധരൻ വ്യക്തമാക്കി.