തൃശൂർ: ലഖിംപൂരിൽ കർഷക സംഘടനകളും യുപി സർക്കാരും ചർച്ച നടത്തി ഒത്തു തീർപ്പിലെത്തിയതിന് ശേഷം തെരഞ്ഞെടുപ്പ് മുന്നിൽ കണ്ട് മുതലെടുപ്പ് രാഷ്ട്രീയത്തിനായി കോൺഗ്രസ് നേതാക്കൾ യുപിയിലേക്ക് പോകുന്നതിനെ പരിഹസിച്ച് ബിജെപി വക്താവ് സന്ദീപ് വാര്യർ രംഗത്ത്. എം എസ് പി ക്കായി സമരം ചെയ്ത കർഷകരെ തല്ലിച്ചതച്ച കോൺഗ്രസ് ഭരിക്കുന്ന രാജസ്ഥാനിലേക്കോ നാല് ആദിവാസി കർഷകരെ വെടിവച്ച് കൊന്ന ഛത്തീസ്ഗഢിലേക്കോ പോകാതെ കോൺഗ്രസ് നേതൃത്വം യുപിയിൽ മുതലെടുപ്പ് നടത്താൻ നോക്കുകയാണെന്ന് അദ്ദേഹം തന്റെ ഫേസ്ബുക്ക് പോസ്റ്റിൽ ആരോപിച്ചു.
യുപി തെരഞ്ഞെടുപ്പ് മുന്നിൽ കണ്ടുള്ള ഈ രാഷ്ട്രീയ നാടകങ്ങൾ കൊണ്ടൊന്നും യോഗിയും മോദിയും ചേർന്നുള്ള കൂട്ടുകെട്ടിനെ പരാജയപ്പെടുത്താൻ കഴിയില്ലെന്നും കയ്യിൽ ബാക്കിയുള്ള അഞ്ചോ ആറോ ശതമാനം വോട്ടു കൂടി അഖിലേഷിനോ മായാവതിക്കോ സംഭാവന ചെയ്ത് രാഹുലിനും പ്രിയങ്കക്കും യുപി വിടാമെന്നും അദ്ദേഹം പരിഹസിച്ചു.
സന്ദീപ് വാര്യരുടെ ഫേസ്ബുക്ക് പോസ്റ്റിന്റെ പൂർണ്ണരൂപം;
ലഖിംപൂരിൽ കർഷക സംഘടനകളും യുപി സർക്കാരും ചർച്ച നടത്തി ഒത്തു തീർപ്പിലെത്തി. മരിച്ചവരുടെ കുടുംബത്തിന് 45 ലക്ഷം വീതം നഷ്ടപരിഹാരവും , കർഷക സംഘടനകളുടെ ആവശ്യപ്രകാരമുള്ള എഫ് ഐ ആറും രജിസ്റ്റർ ചെയ്തു. യുപി പോലീസ് അന്വേഷണത്തിൽ കർഷക സംഘടനകൾക്കും മതിപ്പ്. സംഘർഷാന്തരീക്ഷം ലഘൂകരിക്കപ്പെട്ടു. എങ്ങും ശാന്തത .
അപ്പോൾ അതാ വരുന്നു , പ്രിയങ്കാ വാദ്ര , രാഹുൽ ഗാന്ധി , അഖിലേഷ് യാദവ് …..
മുതലെടുപ്പ് രാഷ്ട്രീയത്തിനായി കുടുംബ രാഷ്ട്രീയക്കാർ യുപിയിലേക്ക് വച്ചു പിടിച്ചിട്ടുണ്ട്. ഇന്നലെ എം എസ് പി ക്കായി സമരം ചെയ്ത കർഷകരെ തല്ലിച്ചതച്ച കോൺഗ്രസ് ഭരിക്കുന്ന രാജസ്ഥാനിലേക്കോ നാല് ആദിവാസി കർഷകരെ വെടിവച്ച് കൊന്ന ഛത്തീസ്ഗഢിലേക്കോ പോകാതെ യുപിയിൽ മുതലെടുപ്പ് നടത്താൻ നോക്കുകയാണ് കോൺഗ്രസ് നേതൃത്വം.
മൂന്ന് ബിജെപി പ്രവർത്തകരെ തല്ലിക്കൊന്നതിനെയോ ഒരു പാവം ഡ്രൈവറെ മൃഗീയമായി വിചാരണ ചെയ്തു കൊന്നതിനെയോ അപലപിക്കാൻ ഇവരാരും തയ്യാറല്ല . പ്രിയങ്ക വാദ്ര ട്വീറ്റ് ചെയ്ത വീഡിയോയിൽ തന്നെ ബിജെപി പ്രവർത്തകർ സഞ്ചരിച്ചിരുന്ന ജീപ്പിൻ്റെ മുൻ ഗ്ലാസ് കല്ലേറിൽ തകർന്നിരുന്നത് ദൃശ്യമാണ് .
അക്രമാസക്തമായ ജനക്കൂട്ടത്തിൽ നിന്നു രക്ഷപ്പെടാൻ വാഹനം വേഗത്തിൽ മുന്നോട്ടെടുത്തപ്പോഴാണ് ദൗർഭാഗ്യകരമായ സംഭവങ്ങൾ അരങ്ങേറിയത് എന്നും വ്യക്തമാണ്. എന്നാൽ പോലും കേന്ദ്ര ആഭ്യന്തര സഹമന്ത്രിയുടെ മകനെ വരെ കർഷക സംഘടനകളുടെ ആവശ്യം പരിഗണിച്ച് പ്രതിചേർത്തിരിക്കുകയാണ് യുപി പോലീസ്. എന്നാൽ കർഷക സമരം സെലക്ടീവ് ആയി നടക്കുന്നതെന്തിനാണ് ? പഞ്ചാബിൽ കർഷക സമരം വേണ്ടെന്നാണ് കോൺഗ്രസ് നിലപാട് .
സുപ്രീം കോടതി തന്നെ സ്റ്റേ നൽകി സമിതിയെ നിയോഗിച്ചു കഴിഞ്ഞിട്ടും കർഷക സമരം തുടരുന്നതിനെ ബഹു . സുപ്രീം കോടതി തന്നെ രൂക്ഷമായി വിമർശിച്ചിരുന്നു. യു പി തെരഞ്ഞെടുപ്പ് മുന്നിൽ കണ്ടുള്ള ഈ രാഷ്ട്രീയ നാടകങ്ങൾ കൊണ്ടൊന്നും യോഗി – മോദി കൂട്ടുകെട്ടിനെ പരാജയപ്പെടുത്താൻ കഴിയില്ല . കയ്യിൽ ബാക്കിയുള്ള അഞ്ചോ ആറോ ശതമാനം വോട്ടു കൂടി അഖിലേഷിനോ മായാവതിക്കോ സംഭാവന ചെയ്ത് രാഹുലിനും പ്രിയങ്കക്കും യുപി വിടാം.
Post Your Comments