ദുബായ് : അബുദാബിയിലെ യാസ് ഐലൻഡിൽ ഒരു പുതിയ തീം പാർക്ക് നിർമ്മിക്കാനൊരുങ്ങുന്നതായി വാൾട്ട് ഡിസ്‌നി കമ്പനി അറിയിച്ചു. അബുദാബി മീഡിയ ഓഫീസാണ് ഇത് സംബന്ധിച്ച അറിയിപ്പ് നൽകിയത്. വാൾട്ട് ഡിസ്‌നി കമ്പനി, മിരാൾ എന്നിവർ സഹകരിച്ചായിരിക്കും ഈ പുതിയ തീം പാർക്ക് നിർമ്മിക്കുന്നത്. പശ്ചിമേഷ്യൻ പ്രദേശങ്ങളിലെ ആദ്യത്തെ ഡിസ്‌നി തീം പാർക്കായിരിക്കും യാസ് ഐലൻഡിൽ ഒരുങ്ങുന്നത്.
അബുദാബി കൾച്ചർ ആൻഡ് ടൂറിസം വകുപ്പ് ചെയർമാൻ മുഹമ്മദ് ഖലീഫ അൽ മുബാറക്, ഡിസ്‌നി സി ഇ ഓ ബോബ് ഐഗേർ എന്നിവർ ചേർന്നാണ് ഇക്കാര്യം പ്രഖ്യാപിച്ചത്. അബുദാബി കിരീടാവകാശിയും, അബുദാബി എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ ഈ പ്രഖ്യാപന ചടങ്ങിൽ പങ്കെടുത്തു.
ആഗോളതലത്തിൽ ഡിസ്നിയുടെ ഏഴാമത്തെ തീം പാർക്കാണ് അബുദാബിയിൽ പ്രഖ്യാപിച്ചിരിക്കുന്നത്. നിലവിൽ കാലിഫോർണിയ, ഫ്ലോറിഡ, ടോക്കിയോ, പാരീസ്, ഹോംഗ് കോങ്ങ്, ഷാങ്ങ്ഹായ് എന്നിവിടങ്ങളിൽ ഡിസ്‌നി തീം പാർക്കുകൾ സ്ഥിതി ചെയ്യുന്നുണ്ട്. യു എ ഇയുടെ ടൂറിസം മേഖലയിലെ സുപ്രധാനമായ ഒരു നാഴികക്കല്ലായിരിക്കും ഈ ഡിസ്‌നി തീം പാർക്ക്.
നിർമാണം പൂർത്തിയാകുന്നതോടെ പശ്ചിമേഷ്യൻ പ്രദേശങ്ങളിൽ നിന്നും, ആഫ്രിക്ക, ഇന്ത്യ, ഏഷ്യ, യൂറോപ്പ് എന്നിവിടങ്ങളിൽ നിന്നുമുള്ള ദശലക്ഷക്കണക്കിന് സഞ്ചാരികളെ യാസ് ഐലൻഡിലെ ഡിസ്‌നി തീം പാർക്ക് ആകർഷിക്കുമെന്നാണ് പ്രതീക്ഷിക്കുന്നത്.
Post Your Comments