ശ്രീരാമശ്ലോക പഞ്ചരത്നം

കഞ്ജാതപത്രായതലോചനായ കര്‍ണാവതംസോജ്ജ്വലകുണ്ഡലായ ।
കാരുണ്യപാത്രായ സുവംശജായ നമോഽസ്തു രാമായ സലക്ഷ്മണായ ॥ 1॥

വിദ്യുന്നിഭാംഭോദസുവിഗ്രഹായ വിദ്യാധരൈഃ സംസ്തുതസദ്ഗുണായ ।
വീരാവതാരായ വിരാധഹന്ത്രേ നമോഽസ്തു രാമായ സലക്ഷ്മണായ ॥ 2॥

സംസക്തദിവ്യായുധകാര്‍മുകായ സമുദ്രഗര്‍വാപഹരായുധായ ।
സുഗ്രീവമിത്രായ സുരാരിഹന്ത്രേ നമോഽസ്തു രാമായ സലക്ഷ്മണായ ॥ 3॥

പീതാംബരാലങ്കൃതമധ്യകായ പിതാമഹേന്ദ്രാമരവന്ദിതായ ।
പിത്രേ സ്വഭക്തസ്യ ജനസ്യ മാത്രേ നമോഽസ്തു രാമായ സലക്ഷ്മണായ ॥ 4॥

നമോ നമസ്തേഽഖിലപൂജിതായ നമോ നമശ്ചന്ദ്രനിഭാനനായ ।
നമോ നമസ്തേ രഘുവംശജായ നമോഽസ്തു രാമായ സലക്ഷ്മണായ ॥ 5॥

ഇമാനി പഞ്ചരത്നാനി ത്രിസന്ധ്യം യഃ പഠേന്നരഃ ।
സര്‍വപാപവിനിര്‍മുക്തഃ സ യാതി പരമാം ഗതിം ॥ 6॥

ഇതി ശ്രീരാമകര്‍ണാമൃതാന്തര്‍ഗതം ശ്രീരാമശ്ലോകപഞ്ചരത്നം സമ്പൂര്‍ണം ।