റിയാദ്: പൊതുസമൂഹത്തിൽ വൈദ്യുതി, വെള്ളം തുടങ്ങിയവ വിതരണം ചെയ്യുന്നതിനുള്ള സംവിധാനങ്ങൾ മനഃപൂർവം കേടുവരുത്തുന്നവർക്കെതിരെ കർശന നടപടി സ്വീകരിക്കുമെന്ന് മുന്നറിയിപ്പ് നൽകി സൗദി പബ്ലിക് പ്രോസിക്യൂഷൻ. ഇത്തരക്കാർക്ക് തടവും പിഴയും ശിക്ഷയായി ലഭിക്കുമെന്ന് സൗദി അറേബ്യ അറിയിച്ചു.
വിധ്വംസനശീലം സൗദി അറേബ്യയിൽ ശിക്ഷ ലഭിക്കാവുന്ന കുറ്റകൃത്യമാണെന്ന് പബ്ലിക് പ്രോസിക്യൂഷൻ വ്യക്തമാക്കിയിട്ടുണ്ട്. ഇത്തരം പ്രവർത്തനങ്ങളിലേർപ്പെടുന്നവർക്ക് 2 വർഷം വരെ തടവും, പരമാവധി ഒരു ലക്ഷം റിയാൽ പിഴയും ശിക്ഷയായി ലഭിക്കുമെന്ന് അധികൃതർ വ്യക്തമാക്കി. പൊതു വിതരണ സംവിധാനങ്ങൾ നശിപ്പിക്കുന്നവർക്കും, അവയുടെ പ്രവർത്തനത്തിൽ തടസം സൃഷ്ടിക്കുന്നവർക്കും ഈ ശിക്ഷ ലഭിക്കും.
ഇത്തരം കുറ്റകൃത്യങ്ങൾ ചെയ്യുന്നവരെ സഹായിക്കുന്നവർക്കും ഈ ശിക്ഷ ബാധകമാണ്. ഇത്തരം പ്രവർത്തനങ്ങളുടെ ഫലമായി കേടുവന്ന സംവിധാനങ്ങളിൽ അറ്റകുറ്റപ്പണികൾ തീർക്കുന്നതിനുള്ള തുക അപരാധിയിൽ നിന്ന് ഈടാക്കുമെന്നും അധികൃതർ കൂട്ടിച്ചേർത്തു. ഇത്തരത്തിലുള്ള ശിക്ഷാ നടപടികൾ നേരിടേണ്ടി വരുന്നവരെക്കുറിച്ചുള്ള വിവരങ്ങൾ ആ വ്യക്തിയുടെ ചെലവിൽ മാധ്യമങ്ങളിൽ പ്രസിദ്ധീകരിക്കുമെന്നും അധികൃതർ ചൂണ്ടിക്കാട്ടി.
Post Your Comments