സാംബ താളത്തിൽ കാലിടറി ദക്ഷിണ കൊറിയ: ബ്രസീൽ ലോകകപ്പ് ക്വാർട്ടറിൽ

ദോഹ: ഖത്തർ ലോകകപ്പിൽ ദക്ഷിണ കൊറിയയെ തകർത്ത് ബ്രസീൽ ക്വാർട്ടറിൽ. ഒന്നിനെതിരെ നാല് ​ഗോളുകളുടെ ജയമാണ് ബ്രസീൽ നേടിയത്. ബ്രസീലിനായി വിനീഷ്യസ് ജൂനിയർ, നെയ്മർ, റിച്ചാർലിസൺ, പക്വേറ്റ എന്നിവരാണ് ​ഗോളുകൾ നേടിയത്. പൈക്ക് സ്യും​ഗ് ഹോ ആണ് ദക്ഷിണ കൊറിയയുടെ ആശ്വാസ ​ഗോൾ നേടിയത്. ജപ്പാനെ പെനാൽറ്റി ഷൂട്ടൗട്ടിൽ പരാജയപ്പെടുത്തിയ ക്രൊയേഷ്യയാണ് ക്വാർട്ടറിൽ ബ്രസീലിന്റെ എതിരാളികൾ.

മത്സരത്തിന്റെ ആദ്യ പകുതിയിലെ ഏഴാം മിനിറ്റിൽ തന്നെ കാനറികൾ വിനീഷ്യസ് ജൂനിയറിലൂടെ ലീഡ് സ്വന്തമാക്കി. ബോക്സിന്റെ വലതുഭാ​ഗത്ത് നിന്നുള്ള റാഫീഞ്ഞയുടെ പാസ് സ്വീകരിച്ച വിനീഷ്യസ് പന്ത് ലക്ഷ്യത്തിലെത്തിച്ചു. 10-ാം മിനിറ്റിൽ കൊറിയയുടെ എല്ലാ സ്വപ്നങ്ങളും തകർത്ത് കൊണ്ട് റിച്ചാർലിസണെ വീഴ്ത്തിയതിന് റഫറി പെനാൽറ്റി വിധിച്ചു.

ബ്രസീലിനായി ലീഡുയർത്തിയ നെയ്മർ ഖത്തർ ലോകകപ്പിലെ തന്റെ ആദ്യ ​ഗോൾ നേടി. മനോഹരമായി 16-ാം മിനിറ്റിൽ വാം​ഗ് ഹീ ചാന്റെ കാലിൽ നിന്ന് പറന്ന ലോം​ഗ് ഷോട്ട് ബ്രസീലിയൻ ​ഗോൾ കീപ്പർ അലിസണെ ഒന്ന് വിറപ്പിച്ചു. പന്ത് കൈവശമുള്ളപ്പോൾ മൂന്നോ നാലോ താരങ്ങൾ വരെ മുന്നോട്ട് കയറി ഒരു ​ഗോൾ മടക്കാനുള്ള നിരന്തര ശ്രമം കൊറിയൻ നിര തുടർന്നു.

29-ാം മിനിറ്റിൽ റിച്ചാർലിസൺ ബ്രസീലിന്റെ മൂന്നാം ​ഗോൾ സ്വന്തമാക്കി. മാർക്വീഞ്ഞോസ് – തിയാ​ഗോ സിൽവ – റിച്ചാർലിസൺ എന്നിവരുടെ പാസിം​ഗ് മികവാണ് ​ഗോളിൽ കലാശിച്ചത്. 36-ാം മിനിറ്റിൽ പക്വേറ്റയിലൂടെ നാലാം ​ഗോളും പിറന്നു.

Read Also:- അയൽവാസി പെട്രോൾ ഒഴിച്ച് തീകൊളുത്തി; ചികിത്സയിലായിരുന്ന യുവാവ് മരിച്ചു

ദക്ഷിണ കൊറിയയുടെ മികച്ച ഒരു ആക്രമണത്തോടെയാണ് രണ്ടാം പകുതി ആരംഭിച്ചത്. സൺ ഹ്യൂം​ഗ് മിന്നിന്റെ ഷോട്ട് മുന്നോട്ട് കയറിയെത്തിയ അലിസൺ രക്ഷപ്പെടുത്തി. 76-ാം മിനിറ്റിൽ വീണ് കിട്ടിയ അവസരം പൈക്ക് സ്യും​ഗ് ഹോ മുതലാക്കി. തുടർന്നും ബ്രസീൽ ഗോൾ മുഖത്ത് ദക്ഷിണ കൊറിയ ആക്രമണങ്ങൾ നടത്തിയെങ്കിലും അവസരങ്ങൾ മുതലെടുക്കാൻ സാധിച്ചില്ല.