‘ പുലർച്ചെ അസിം മുനീർ എന്നെ വിളിച്ച് ഉണർത്തി’ : വ്യോമതാവളങ്ങളിൽ ഇന്ത്യ ആക്രമണം നടത്തിയെന്ന് സമ്മതിച്ച് ഷെഹ്ബാസ് ഷെരീഫ് 

കറാച്ചി : നൂർ ഖാൻ വ്യോമതാവളം ഉൾപ്പെടെയുള്ള രാജ്യത്തെ പ്രധാന വ്യോമതാവളങ്ങളിൽ ഇന്ത്യ നടത്തിയ കൃത്യതയുള്ള ആക്രമണങ്ങളെക്കുറിച്ച് അർദ്ധരാത്രിയിൽ തന്നെ പട്ടാള മേധാവി അസിം മുനീർ അറിയിച്ചതായി പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് വെള്ളിയാഴ്ച വെളിപ്പെടുത്തി. ‘ഓപ്പറേഷൻ സിന്ദൂർ’ എന്ന പേരിൽ ഇന്ത്യ നടത്തിയ ആക്രമണങ്ങളെക്കുറിച്ച് പുലർച്ചെ 2:30 ന് പാകിസ്ഥാൻ ആർമി ചീഫ് ജനറൽ അസിം മുനീർ മുന്നറിയിപ്പ് നൽകിയതായി ഷെരീഫ് പറഞ്ഞു.

മെയ് 10 ന് പുലർച്ചെ 2:30 ന്, ജനറൽ സയ്യിദ് അസിം മുനീർ എന്നെ സുരക്ഷിതമായ ഒരു ലൈനിൽ വിളിച്ച് ഇന്ത്യയുടെ ബാലിസ്റ്റിക് മിസൈലുകൾ നൂർ ഖാൻ എയർബേസിലും മറ്റ് പ്രദേശങ്ങളിലും ആക്രമണം നടത്തിയതായി അറിയിച്ചുവെന്ന് പ്രധാനമന്ത്രി പറഞ്ഞതായി എ എൻ ഐ റിപ്പോർട്ട് ചെയ്തു. ഇന്ത്യയുടെ ആക്രമണങ്ങളിൽ പ്രധാനപ്പെട്ട നൂർ ഖാൻ എയർബേസ് ഉൾപ്പെടെയുള്ള പാകിസ്ഥാന്റെ സൈനിക അടിസ്ഥാന സൗകര്യങ്ങൾക്ക് കനത്ത നാശനഷ്ടം വരുത്തിയതായും അദ്ദേഹം സമ്മതിച്ചു.

ഏപ്രിൽ 22 ന് ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിൽ 26 സാധാരണക്കാർ കൊല്ലപ്പെട്ടതിന് പ്രതികാരമായി മെയ് 7 നാണ് ഇന്ത്യൻ സായുധ സേന ഓപ്പറേഷൻ സിന്ദൂർ ആരംഭിച്ചത്. ഈ ഓപ്പറേഷന്റെ കീഴിൽ പാകിസ്ഥാനിലെയും പാകിസ്ഥാൻ അധിനിവേശ ജമ്മു കശ്മീരിലെയും ഭീകര താവളങ്ങളിൽ ഇന്ത്യ കൃത്യമായ ആക്രമണം നടത്തി.

ഇന്ത്യയുടെ നടപടിക്ക് ശേഷം, മെയ് 8, 9, 10 തീയതികളിൽ പാകിസ്ഥാൻ ഇന്ത്യൻ സൈനിക താവളങ്ങൾ ആക്രമിക്കാൻ ശ്രമിച്ചു. തുടർന്ന് പാകിസ്ഥാൻ സൈനിക കേന്ദ്രങ്ങൾ ലക്ഷ്യമിട്ട് ഇന്ത്യ പ്രത്യാക്രമണം നടത്തി. തുടർന്ന് മെയ് 10 ന് നാല് ദിവസത്തെ തീവ്രമായ അതിർത്തി ആക്രമണങ്ങൾക്കും ഡ്രോൺ ആക്രമണങ്ങൾക്കും ശേഷം സൈനിക സംഘർഷം അവസാനിപ്പിക്കാൻ ഇരു രാജ്യങ്ങളും ധാരണയിലെത്തി.

അതേ സമയം വെള്ളിയാഴ്ച ഒരു പൊതു പരിപാടിയിൽ സംസാരിക്കവെ കശ്മീർ ഉൾപ്പെടെയുള്ള തീർപ്പുകൽപ്പിക്കാത്ത പ്രശ്നങ്ങൾ പരിഹരിക്കാൻ ഇരു രാജ്യങ്ങളും തമ്മിൽ ചർച്ച നടത്തണമെന്ന് ഷെരീഫ് ആഹ്വാനം ചെയ്തതായി പിടിഐ റിപ്പോർട്ട് ചെയ്തു.

എന്നാൽ പാക് അധിനിവേശ കശ്മീരിന്റെ തിരിച്ചുവരവും ഭീകരവാദ വിഷയവും സംബന്ധിച്ച് മാത്രമേ അയൽ രാജ്യവുമായി ചർച്ച നടത്തുകയുള്ളൂവെന്ന് ഇന്ത്യ വ്യക്തമാക്കിയിട്ടുണ്ട്.